Os Premios Martín Códax da Música abriron este luns o prazo de inscrición para a súa duodécima edición, que terá lugar o 28 de maio, en Pontevedra. Ademais, nesta ocasión, a gala gardará estreita conexión co Día das Letras Galegas 2025, dedicado ás cantareiras e a poesía oral tradicional.

Nos últimos anos, máis de catrocentas candidaturas inscribíronse nas quince categorías musicais que conforman os prestixiosos Martín Códax da Música: Pop e Indie; Rock e Punk; Blues, Funk e Soul; Metal e Heavy; Canción de Autor/a; Músicas Urbanas; Músicas do Mundo e Mestizaxe; Electrónica; Música Clásica e Contemporánea; Jazz e Músicas Improvisadas; Música Tradicional; Música Folk; Música Infantil; Orquestras, Grupos e Música de Verbena; e Bandas de Música Popular.

Cabe recordar que unha vez rematado o prazo de inscricións, o xurado profesional estudará e valorará as candidaturas nun proceso, durante o mes de abril, do que sairán 3 finalistas en cada unha delas —que se anunciarán a primeiros de maio nas Bodegas Martín Códax en Cambados—. Ademais dos 48 proxectos musicais elixidos, tamén se darán a coñecer os tres finalistas da categoría extraordinaria de Artista Emerxente e dos premios Organistrum.