“Había unha vez un planeta nunha lonxana galaxia no que vivían uns seres (...) que posuían habilidades extraordinarias. Tras moitos anos permitindo que se incendiansen os montes e construíndo encoros (...) aquel lonxano planeta chegou ao seu límite e estoupou. Dous dos seus habitantes escaparon xusto a tempo nunha nave espacial que se estrelou contra a Terra. Eles son os Supergalácticos. Viven entre nós e usan os seus superpoderes cómicos para axudarnos”. Estes peculiares superheroes teñen ADN cuntiense. Son Saleta Fernández e Alberto Torres, que buscan con este proxecto consolidarse no circuito profesional de teatro logo da súa primeira experiencia en “Ladrón e familia”, da man da compañía Teatro do Astracán e baixo a dirección de Evaristo Calvo.
Con case unha década de traxectoria na agrupación de teatro afeccionado Escola Artística de Cuntis, Saleta e Alberto completaron a súa formación participando en obradoiros e cursos monográficos de clown, técnicas de improvisación, interpretación dramática ou movemento escénico baixo a tutela de Iván Prado, Antón Valén, Jesús Jara, Miriam Villalobos ou Anabel Gago, entre outros. Agora queren voar. E para iso nada mellor que botar man da capa de superheroes coa que o domingo aterrarán no Centro Sociocultural “Patelas” (19 horas, con entradas a 3 euros) para poñer en escea un divertido espectáculo dirixido principalmente ao público infantil e familiar. Durante sesenta minutos os Supergalácticos deberán sobrevivir ás situacións máis ridículas e perigosas ante un público que se verá arrastrado a unha participación activa, imprescindible para conseguir a victoria final sobre o malo malísimo: o terrorífico Dr. Neutrón. 
Trátase dunha obra de pequeno formato que se adapta a calquera espazo escénico, tanto en interior como en rúa. Mistura teatro xestual, clown e teatro infantil, deixando tamén espazo para a improvisación por parte dos dous protagonistas, que deron forma    á compañía Código Morsa para dar saída ás súas inquedanzas artísticas. Ademais de Saleta Fernández, Alberto Torres e o director Fran Rei, o equipo complétase con Sonia Díaz, responsable de comunicación e contidos.
As entradas para presenciar as aventuras dos Supergalácticos están xa á venda no bar Chistoso e no establecemento Enea-Fotógrafos. Asimesmo, pódense mercar por 8 euros os tíckets para o espectáculo que protagonizarán Mofa e Befa (Víctor Mosquera e Evaristo Calvo) tamén o domingo ás 21:30 horas no “Patelas”. n