O proxecto conta cun orzamento de 441.392 euros e un prazo de execución de seis meses. Entre os obxectivos deste equipamento inclúese o de converterse nun espazo adicado á defensa do monte, pero tamén nunha contorna referencial, medioambiental e construtivamente falando, no polígono industrial rianxeiro. Este contedor de servizos de protección forestal será un lugar de descanso e traballo dos brigadistas e desde aí accederán aos operativos que xurdan e que terán a vantaxe pola cercanía á autovía e outras estradas na bisbarra. Desde esta base poderán incorporarse loita contra os incendios con grande rapidez.

Muiños lembrou que na construción se apostou por reducir ao mínimo o impacto da edificación, o uso de madeiras como o castiñeiro e piñeiro ou a cuberta axardinada. "Unha construción quilómetro cero no que se procurou a eficiencia enerxética en todas as instalacións, con sistema de climatización por aerotermia e sistemas de control e regulación para as luminarias led", precisou o primeiro edil. O mandatario rianxeiro tamén recordou a boa disposición municipal para ceder esta parcela consciente de que "é un equipamento que traerá un beneficio directo como é achegar a Rianxo aos operativos que por desgraza son imprescindibles polos incendios do propio concello e da bisbarra. Tamén por crear infraestruturas de referencia supramunicipais no municipio", concluiu.