A Concellería de Cultura, dirixida por Sonia Outón, porá en marcha a actividade teatral ‘Sempre Rosalía’, organizada para conmorar o nacemento da poeta máis universal, efeméride que ten lugar o  23 de febreiro. Con este motivo, a edil e o alcalde, Alberto Varela, presentaron en Carril a programación preparada, xunto coa presidenta do Gato Negro, Lourdes Durán. 
 

Trátase dunha obra de Producións Dispersas que ten unha duración de 20 minutos e, segundo explicou a edil, “está dirixida a cativos e maiores”. Ao escenario subiranse Ana Ponte, que interpretará á escritora, e Diego Freire, que fai dun dos seus biógrafos. O argumento baséase nunha conversa entre ambos, cargada de humor e de moita poesía, non só as da propia Rosalía de Castro, senón tamén doutros autores clave.
O obxectivo, explican desde Ravella, é presentar unha visión diferente da súa figura, alén dos estereotipos e reducionismos que a caracterizan, “fuxindo da imaxe edulcorada e falseada que se impuxo durante anos”, tal e como apuntan desde a produtora.

Por toda a vila

Unha das primeiras funcións celebrarase, precisamente, en Carril, un enclave moi especial para a autora. “A relación de Rosalía con este lugar era moi intensa. Aquí pasou os veráns e pénsase que aquí creou a célebre cita ‘Abride as fiestras, que quero ver o mar”, explicou Outón. “Na súa obra está presente o seu amor por esta terra e agora somos nós os que queremos renderlle homenaxe”, reflexionou o alcalde, Alberto Varela.
A mostra estará cada hora nun lugar porque a duración o permite e tamén pola súa montaxe, que é moi sinxela, según explicou a edil de Cultura. Deste xeito, as funcións comezan o venres, ás 17 horas, no Centro Cultural de bamio, para seguir en O Gato Negro, Trabanca Sardiñeira e en Guillán. O sábado, ás 12:30 horas, estarán na Biblioteca Rosalía de Castro e pola tarde, a partir das 17 horas, en Faxilde, Vilaxoán, Sobradelo e Trabanca Badiña. Os últimos pases serán o domingo. Pola mañán, ás doce estará no Centro Cultural de Solobeira e ás 13 horas en Rubiáns. Seguirán pola tarde, a partir das 17 horas, nos Borrizos de Cornazo, despois irán á Laxe, ao Centro Cultural de San Roque e ao Breogán do Piñeiriño.
 

A entrada é de balde e dende o Concello animan, incluso, a acudir en máis dunha ocasión, facendo o percorrido pola vila. Desta maneira, tamén se contribúe a dinamizar os centros culturais, así como a levar os espectáculos de teatro por todo o municipio, difundindo non só a vida e a figura de Rosalía de Castro, senón podemas doutros autores, que chegarán ao gran público.