Xa está na rúa unha nova edición da revista de banda deseñada Enormic Banda cun total de 32 páxinas onde se misturan os traballos de novos talentos da comarca coas verbas e as pinceladas de recoñecidos autores e artistas. Cada número é especial, pero este aínda o é máis porque é unha mostra viva do futuro do proxecto e porque é o último do profesor Xabier Camba como coordinador da Coordinadora de Equipos de Normalización Lingüística dos centros de secundaria do Salnés –quen o promove–, tras 20 anos de vinculación coa iniciativa, en resumo, dende o seus inicios. O docente deixa o IES Cotarelo de Vilagarcía para ocupar un posto nun centro da súa terra, A Estrada, e onte recibiu unha pequena homenaxe dos  seus compañeiros e un agasallo que, como non podía ser doutro modo, era unha das portadas da revista, a de 2011, elaborada polo artista vilagarcián Uxío.

invitados de luxo
Este número leva na portada a firma da pintora Emérita Méndez, residente en Cambados, que ten feito mostras individuais e colectivas en diferentes lugares da comarca; mentres que o académico Francisco Fernández Rei é o autor do prólogo, no que fai mención a un bo amigo, nada menos que o profesor xaponés Takekazu Asaka, autor do libro “Cantata a Ramón Cabanillas”, entre outras cuestións.
O contido consiste en 26 traballos gráficos realizados por un total de 31 alumnos dos centros Miguel Ángel González, Castro Alobre, Armando Cotarelo, Bouza Brei, A Basella, Faro das Lúas, Illa de Arousa, Ramón Cabanillas, Francisco Asorey, Vilalonga, Monte da Vila, Barro e O Mosteiro.
A presentación tivo lugar no Cabanillas e coa presenza deses colaboradores de luxo e a nota emotiva aportouna ese recoñecemento “ao traballo a prol da lingua e da dinamización cultural do Salnés” feito a Camba.
A súa marcha non deixa indiferente a ninguén, pero o proxecto sigue e en boas mans. Os tempos son difíciles, pero durante a súa traxectoria tamén os houbo malos e se logrou seguir adiante. De feito, a revista naceu no curso 95-96 e foi moi fructífera nas primeiras edicións, pero o decenso de traballos e a falta de interese do alumnado dos centros implicados, mesmo para a súa lectura, fixeron que se aparcase por un tempo e ata o 2004, cando se retomou e con moi boa saúde.
Os gastos da edición cúbrense  coa venda de exemplares. Nesta ocasión editáronse 1.400 onde se pode observar o talento emerxente da comarca porque o su obxectivo era precisamente amosar a elaboración de traballos gráficos, viñetas, historietas... Feitos polos máis mozos e tamén como unha ferramenta de dinamización do galego.